दार्चुलाको खलंगा बसपार्कनजिक बेहोस अवस्थामा भेटिएका पुरुषको मृत्यु भएको छ ।
महाकाली नगरपालिका-४ स्थित बसपार्कनजिक बेहोस अवस्थामा भेटिएका अन्दाजी ३५ वर्षीय पुरुषको मृत्युु भएको हो । चोटपटक लागेर गम्भीर अवस्थामा फेला परेका ती पुरुषलाई उद्धार गरेर प्रहरीको टोलीले जिल्ला अस्पताल दार्चुलामा उपचारका लागि भर्ना गरिएको थियो ।
बेवारिसे अवस्थामा फेला परेका उनको उपचारका क्रममा मृत्यु भएको जिल्ला प्रहरी कार्यालय दार्चुलाका सूचना अधिकारी जगत गहामगरले जानकारी दिए । उनको परिचय खुल्न सकेको छैन । उनको अनुहार र टाउकोमा गम्भीर चोट लागेको छ । कसैले कुटपिट गरेर फालेको हुन सक्ने प्रहरीको अनुमान छ ।
घटनाबारे थप अनुसन्धान भइरहेको प्रहरीले जनाएको छ ।
