गुगल म्यापको भर पर्दा भत्किएको पुलबाट खस्यो कार, चालकको मृत्युपछि गुगलविरुद्ध मुद्दा


[बेलौरी खबर ]
लेखक : admin      ७ महिना अगाडि मा प्रकाशित     
गुगल म्यापको भर पर्दा भत्किएको पुलबाट खस्यो कार, चालकको मृत्युपछि गुगलविरुद्ध मुद्दा

गुगल म्यापको भर परेर कार कुँदाइरहेका एक अमेरिकीको गत वर्ष दुर्घटनामा मृत्यु भयो । गुगल म्यापमा बाटो अपडेट नभएको र भत्किसकेको पुलसमेत सद्दे नै देखाएका कारण चालकले सोही पुलमाथि कार कुदाउँदा दुर्घटना भएर कार नदीमा खसेको थियो ।

गुगलले आफ्नो म्याप्स एप अपडेट नगरेका कारण दुर्घटनामा मानवीय क्षति भएको भन्दै मृतक फिलिप प्याक्सनका परिवारले गुगलविरुद्ध मुद्दा हालेका छन्।

नौ वर्ष अगाडि नै भत्किएको पुलको विवरण गुगल म्यापमा अद्यावधिक नगरेर गुगलले लापरबाही गरेको फिलिपका परिवारको आरोप छ ।

अमेरिकाको नर्थ क्यारोलिनास्थित हाइकोरीमा रहेको एउटा क्षतिग्रस्त पुलमाथि गाडी कुदाउने को २०२२ को सेप्टेम्बरमा प्याक्सनको मृत्यु भएको थियो ।

मंगलबार उनका परिवारले वेक काउन्टिस्थित देवानी अदालतमा गुगलविरुद्ध मुद्दा दायर गरेका हुन् । गुगलका प्रवक्ताले कम्पनीमाथि लागेको अभियोगको समीक्षा भैरहेको बताएका छन् । प्याक्सन परिवारप्रति आफ्नो गहिरो समवेदना रहेको पनि गुगलका प्रवक्ताले बताएका छन् ।

अदालतमा दायर भएको मुद्दाको निवेदन अनुसार प्याक्सनले साथीको घरमा आयोजित आफ्नी नौ वर्षीया छोरीको जन्मदिनको पार्टी सकेर घर फर्किरहेको बेला कार दुर्घटना भएको थियो । प्याक्सन दुर्घटनास्थलको सडक तथा वस्तुस्थितिका बारेमा जानकार थिएनन् र गुगल म्याप लगाएर गाडी कुदाइरहेका थिए ।

निवेदनको व्यहोरामा भनिएको छ : स्थानीय सडकका बारेमा उनी अपरिचित थिए र सुरक्षित रुपमा आफ्नो घरतर्फ निर्देशित गर्ने विश्वासमा उनी गुगल म्याप्समा भर परेका थिए ।

उनीभन्दा अगाडि पत्नीले छोरीहरुलाई लिएर घर फर्किसकेको र उनी पार्टी सकिएपश्चात् सरसफाइँ गरेर मात्रै घर फर्किन थालेकाले एक्लै दुर्घटनामा परेका थिए ।

त्यसबेला रातको अन्धकार थियो भने वर्षातसमेत भैरहेको हुनाले उनले निकै सचेततापूर्वक कार चलाइरहेका थिए । उनले त्यो अपरिचित ठाउँमा कुनै शंका नै नगरिकन गुगल म्याप्सको दिशा पछ्याइरहेका थिए । त्यहीँ बाटो पछ्याउँदै उनको कार स्नो क्रिक नदीमा रहेको भत्किएको पुलमाथि बाट तल खस्न पुग्यो र नदीमा डुबेर उनको मृत्यु भयो ।

सन् २०१३ मै भत्किएको उक्त पुलको विवरण आफ्नो अनलाइन म्यापमा अद्यावधिक गर्नका लागि स्थानीय बासिन्दाहरुले गुगललाई पटकपटक सम्पर्क गरेका रहेछन्, तर गुगलले आफ्नो नक्सामा उक्त पुललाई सद्दे नै देखाएको थियो ।

क्षतिग्रस्त पुलको मुखमा रहेको बार पनि तोडफोड गरेर भत्काइएका कारण कार चालक निर्धक्क पुलमा प्रवेश गरेका थिए ।

मृतक फिलिपका परिवारले सो पुल मर्मत गर्ने जिम्मेवारी पाएका स्थानीय तीनवटा कम्पनीविरुद्ध पनि मुद्दा हालेका छन् ।